Unnuk Kulturisiorfik pillugu

Sammisassat

Unnuk Kulturisiorfik ukiut tamaasa nunarput tamakkerlugu ingerlanneqartarpoq. Kulturilerisut, suliffeqarfiit, peqatigiiffiit suliniaqatigiiffiillu allat matutik kikkunnut tamanut ammartarpaat kulturimut tunngasunik pissanganartunik sammisaqartitsiniarlutik. Suliniaqatigiiffiit tamarmik peqataasinnaapput, innuttaasullu tamarmik pisunut assigiinngitsorpassuarnut misigisassarsiornissamut qaaqquneqartarput, isiginnaartitsisoqartarpoq, takornariartitsisoqartarpoq kalattoortoqartarpoq allarpassuillu sammisassaritinneqartarlutik. Ukioq kingulleq pilersaarutaasimasut qiviallattaarlugit isumassarsiortoqarsinnaavoq, taannalu uani takuneqarsinnaavoq.  

2001-imiilli

Unnuk Kulturisiorfik 2001-imili nunatsinni ingerlanneqartalerpoq, Europami Unnuk Kulturisiorfiit isumassarsiffigalugit. Nunatta Atuagaateqarfia aallarnisaasuuvoq, ataqatigiissaarisuulluni sulilu maannamut aaqqissuusseqataasartunut inuppassuarnullu katersuuffiulluni.

Nunatta Atuagaateqarfia

Nuummi Nunatta Atuagaateqarfia Unnuk Kulturisiorfik pillugu paasissutissiiffiuvoq. Tassani Unnuk Kulturisiorfimmut pilersaarutit aaneqarsinnaapput, bussit ingerlaarnissaat paasissutissallu allat Unnuk Kulturisiorfimmut tunngasut.